Դելֆիններ

Հայտնի է դելֆինների 40 տեսակ: Դելֆինների մարմնի երկարությունը 1–3 (երբեմն՝ մինչև 10) մ է: Ունեն կտցանման երկար դունչ, 70-ից ավելի ատամ, մեծ մասը՝ նաև մեջքային լողակ: Դելֆինների գունավորումը տարբեր է: Սովորաբար նրանք ապրում են վտառներով՝ յուրաքանչյուրում 15–40
կենդանի: Լողում են ժամում մինչև 50 կմ արագությամբ: Չնայած ջրում ապրելուն՝ օդ են շնչում: Սնվում են ձկներով, գլխոտանի փափկամարմիներով, երբեմն՝ խեցգետնակերպներով: Ունենում են 1 ձագ, որին 4–6 ամիս կերակրում են կաթով: Խոշոր դելֆիններն ապրում են 50, մանրերը՝ 30 տարի: Կան նստակյաց և գաղթող տեսակներ:
Երբ դելֆիններից մեկն օգնություն է կանչում, ընկերները սրընթաց լողալով մոտենում են, բռնում նրան 2 կողմից և պահում ջրի վրա, որպեսզի նա կարողանա շնչել: Նույն կերպ նրանք օգնում են նաև խեղդվող մարդուն:
Դելֆիններն իրենց ձայնատեղորոշիչ հատկության և նուրբ լսողության շնորհիվ շատ լավ կողմնորոշվում են ջրում (նույնիսկ` շատ պղտոր) և մթության մեջ: Ձայնաազդանշանային օրգանը տեղավորված է քթանցքում: Ուղեղի մեծ չափերի շնորհիվ դելֆինները կարող են վերամշակել բազմաթիվ ձայնային և այլ տեղեկություններ:
Դելֆինները միմյանց հետ հաղորդակցվում են սուլոցի և չպպոցների նմանվող ձայներով: Նրանք կարող են նմանակել նաև մարդկային խոսքը:
Դելֆիններին փորձում են վարժեցնել ձկնորսության, կապի և ստորջրյա այլ աշխատանքներ կատարելուն, ինչպես նաև նրանց մարմնին ամրացրած տվիչների (չափիչ, ազդանշանային, կարգավորիչ կամ կառավարող հարմարանքների տարր) օգնությամբ օվկիանոսի տարբեր
խորություններում հոսանքների, ռադիոակտիվության,

ջերմաստիճանի, աղայնության մասին տվյալներ ստանալու համար: Ուսումնասիրվում են նաև դելֆիններին ականների, խորտակված նավերի, սուզանավերի հայտնաբերման համար օգտագործելու հնարավորությունները:
Դելֆինների որոշ տեսակներ ունեն արդյունագործական նշանակություն. օգտագործվում է նրանց միսը և ճարպը:

• Վաղուց ի վեր դելֆինների ընկերասիրության մասին զարմանահրաշ պատմություններ են պատմում: Ըստ հունական մի լեգենդի՝ դելֆինն ամեն օր ծովածոցով մի տղայի էր  տանում դպրոց ու հետ բերում: Ստացվել է այնպես, որ տղան հիվանդացել ու մահացել է: Իր փոքրիկ բարեկամին երկար սպասելով` կարոտից մեռել է նաև դելֆինը: 
• Հույն պատմիչը վկայում է, որ դելֆինները ձկնորսներին օգնում էին ձկները քշելու ուռկանների մեջ  և իբրև պարգև ստանում էին գինու մեջ թրջած հացի կտորներ: 
• Նոր Զելանդիայում` Ծովակալության ծոցում, մի դելֆին 30 տարի շարունակ ուղեկցում էր նավերը, և նրա պաշտպանության համար հատուկ օրենք էր ընդունվել:

     Դելֆիններն ԱՄՆ-ում զանգվածային                ինքնասպանություն են գործել

Ավելի քան 750 դելֆին-աֆալիններ վերջին ամիսների ընթացքում դուրս են նետվել ԱՄՆ-ի ատլանտյան  ափերին, հայտարարել են Օվկիանոսների ու մթնոլորտային հետազոտությունների ազգային վարչության բնապահպանները: Դելֆինների ափ նետվելը տեղի է ունենում ժամանակ առ ժամանակ, սակայն այս տարի այդ ֆենոմենը տասն անգամ գերազանցել է բոլոր վիճակագրական տվյալները  Ամերիկայի արեւլյան ափամերձ գոտում:

Մասնագետների ուսումնասիրության համաձայն՝ հուլիսի 1-ից մինչեւ նոյեմբերի 3-ը Նյու-Յորքից մինչեւ Ֆլորիդա ընկած ափամերձ հատվածում  սատկել են 753 դելֆիններ: Ենթադրվում է, որ դելֆինները սկսել են ափ նետվել կեղեւի վարակի տարբեր տեսակներից, որոնք հանգեցնում են թոքաբորբի եւ ուղեղի վարակումների, հաղորդում է «Գոլոս Ռոսսիի»-ն:

«Միջին պատմական ցուցանիշները աշխարհագրական այս գոտում համապատասխան ժամանակատվածներում կազմում է 74 դեպք. այժմ արդեն տեղի ունեցածի մասշտաբը հասկանալի է»,- լրագրողներին հայտնել է NOAA-ի ներկայացուցիչ Թերի Ռոուլեսը:

Դելֆինները հաճախ են ափ նետվում: Հիմնականում տեղի է ունենում ամռան ամիսներին, երբ կաթնասունների խմբերը գաղթում են: Մինչ այժմ գիտնականները չեն կարողանում հստակ պատասխան տալ, ինչը կարող է կետանմանների զանգվածային ինքնասպանությունների համար, որոնք ժամանակ առ ժամանակ տեղի են ունենում աշխարհի տարբեր հատվածներում:

  Դելֆիններն Ավստրալիայում զանգվածային        ինքնասպանություն են գործել

 Դելֆինները կրկին զանգվածային ինքնասպանություն են գործել. 90 կաթնասուններ դուրս են նետվել Ավստրալիայի եւ Թասմանիա կղզու միջեւ գտնվող Բասովի նեղուցի մերձակայքի 2 փոքր կղզիների ափ:

13 դելֆինների առաջին խումբը Քինգ կղզու ափին գտնվել է  նոյեմբերի 3-ի երեկոյան, իսկ հաջորդ օրը հարեւանությամբ գտվող փոքրիկ կղզի են  նետվել 80 դելֆիններ, հաղորդում է ԻՏԱՌ-ՏԱՍՍ-ը: 

Ավստրալական ռեյնջերները, որոնց օգնել են բազմաթիվ կամավորներ, ամբողջ կիրակի օրը աշխատել են  ծովային կենդանիների փրկության համար, որոնցից շատերին ստիպված են եղել հանել ափամերձ ավազների միջից:  Չնայած ջանքերին` 70 դելֆին զոհվել է:

Ըստ մասնագետների կանխատեսման` դելֆինների  զանգվածային 2 նետումներն իրարից ոչ հեռու գտնվող կղզիների ափեր ունի մեկ ընդհանուր պատճառ: Ճիշտ է, ոչ ոք այն չի կարող ասել:

Ինչպես գրում է  LifeNews-ը, կենսաբանները պնդում են, որ բազմաթիվ վարկածներ կան դելֆինների ինքնասպանության վերաբերյալ, սակայն  դեռեւս վստահ չեն, թե դրանցից որն է ճիշտ: